Арыстанбабқа түне, Қожа Ахметтен тіле

Мұхаммед пайғамбар ақыреттің алдында барлық туыс-жақындарын, сырлас достары мен жора-жолдастарын жинап:
— Мен бұл дүниемен және сіздермен қоштасқалы жатырмын. Кейінгі ұрпақтарымның біріне берер аманатым бар. Соны оған кім тапсырар екен, — деді де жан-жағына қарайды.
Сол кезде Арыстанбаб орнынан тұрып, екі қолын көкірегіне қойып:
— Бұған мен әзірмін, — дейді.
Мұхаммед пайғамбар:
— Келешекте өмірге Ахмет деген бала келеді. Соған мына құрма жемісін тапсырарсың, — деп қалтасынан бір түйір құрманы алып береді.
Ахмет деген балаға тапсыратын аманатын ұртына салған Арыстанбаб Мұхаммед пайғамбарға:
— Мен ол баланы қайдан іздеймін, қалай табам, қалай танимын, — деп сауал қояды.
Сонда Мұхаммед:
— Іздеп әуре болмай-ақ қойыңыз. Берген аманатымды сізден өзі-ақ сұрап алады, — дейді.
Пайғамбардың айтқаны айнымай келеді.
Бірде далада келе жатқанда, 11 жасар балаға кездеседі.
— Ақсақал, аманатымды беріңіз, — дейді бала.
Арыстанбаб атын сұрап жатпай, «Аузыңды аш» дейді оған. Ол аузын ашқанда, бабаның ұртындағы құрма зып етіп баланың аузына кіріп кетеді. Бала лим-мим деп тіл қатпастан жүре береді.
— Сен неткен көргенсізсің, маған айтқан рақметің қайда? — деп дауыстайды Арыстанбаб.
Сонда бала артына бұрылып:
— Сізге несіне рақмет айтамын. Сіз бар шырынын сорып жеп, маған құр сүйегін қалдырып отырсыз, — дейді де, сәлден соң:
— Олай болса, сізге келіп түнесін, менен тілек тілесін, — деп жүріп кетеді.
Содан бері халық Түркістанға сапар шеккенде әуелі Арыстанбабтың басына барып, мінә-жет етеді. Құран оқытып, барлық әруақтарға бата бағыштайды. Мазары маңына бір түнеп, одан кейін Ахмет Иассауи кесенесіне аттанады.
Халық арасында: «Арыстанбабқа түне, Қожа Ахметтен тіле» деген даналық содан алған. Кейде бұл нақылды «Әулиенің басына түне, Алладан тіле» деп те айтатындар да бар.

Кеңес ОРАЗБЕКҰЛЫ.

Добавить комментарий

Ваш адрес email не будет опубликован. Обязательные поля помечены *