“Ақ олимпиада” — балабақшада

“Ақ олимпиада” — балабақшада басталып, бүлдіршіндер Азиаданың бой тұмары “Аланды” қарсы алды. Және оларға “Азиада-2011” көрмесін тамашалатты.
Алматы қаласындағы  Гүлнар Айтбайқызы басқаратын № 57 балабақша тәрбиеленушілері ҮІІ  қысқы Азиада ойындары өтетінінен хабардар. Өйткені, күнде ертеңгілік жаттығу кезінде  жаттықтырушы Анжелла Бексеитова, музыкалық жетекшісі Лиза Ниязова апайлары айтып оты-рады. Біз куәсі болған «Біз— көңілді балалар» тәрбие сағаты да Азиадаға арналды.
— Балалар, Азиада  ойындары қашан басталады?
— 2011 жылы қаңтарда және ақпанда.
— Қай қалаларда өтеді?
— Алматы мен Астанада,-дейді бәрі бірге жауап беріп.
— Балалар,  спорттың қанша түрінен жарыс өтеді? 
 Бұл сұраққа сәбилер сәл кібіртіктеп, саусақтарын санап қалды. Ересектер тобының  ботақандары ғой. Естерінде қалмапты. Олардың білмегенін топ жетекшісі Гүлмира Нышанханқызы  түзетіп жүр. Осыдан кейін балалар орталарына «Аланды» шақырып, бәрі мәре-сәре болды да қалды. Тақпақтарын айтты, ән салды. Спорттық ойындар ойнады. Өнерін де, спортпен шұғылданатынын да көрсетті. Ата-анасымен қосылып, тамаша сурет салатындарын байқатты.
— Мына суреттерге қарасаңыз, балабақшаның әр тобындағы балдырғандар салды дегенге сене қою қиын. Үлкендердің  көмектескені сезіліп тұр. Бізде ғана емес, аудан көлеміндегі балабақшалар арасында ұйымдастырылатын көрме ғой. Тәуір болсын деген ойымыз,-деп  әдіскер Ақтоты  Сейсенбайқызы ағынан жарылды.
     Қысқы Азия ойындарына байланысты
ертеңгілік П.Ерназарова, Г.Шайкенова, Г.Қайыпбаева, К.Қадырбаеваның топтарында да өтті. 
Ж.Тұрсынқызы.