Тағылымы мол шара өтті

Жуырда Астана қаласы әкімдігінің №64 мектеп- лицейіне Алаштың ардақты ұлы, ірі мемлекет қайраткері, ақын, ағартушы Сұлтанбек Қожанов есімі берілуіне және бюстінің ашылуына арналған “Тарихи тұлға есімімен болашаққа қадам» тақырыбында қалалық семинар өтті. Тағлымы мол жиынға ҚР Оқу-ағарту министрлігінің орта білім беру комитетінің басқарма басшысы Әлия Иағалиқызы Чокушева, Астана қаласы Білім басқармасының басшысы Сенғазыев Қасымхан Сенғазыұлы, Түркиядан Сұлтанбек Қожановтың шөбересі Сардар Жолбарыс Шеншен және елордадағы зиялы қауым өкілдері, ел елден, жер жерден қожановтанушылар, ұлт перзентіне тағзым етушілер келді. Өзі туған ауылы Созақтың Ақсүмбе елді мекенінен келген педагогтер де болды.

Келген қонақтар, қатысушылар мектеп оқушыларының шығармашылық жұмыстарымен танысып, өнерлерін тамашалады. Сұлтанбек Қожанов бюсті салтанатты түрде ашылып, лентасы қиылды. Іс-шара Жолтай Жұмат- Әлмашұлының“ Сталинмен бетпе- бет” тарихи драмасы негізінде дайындалған қойылыммен жалғасты. Өз халқының жарқын болашағы үшін күрескен, сол үшін жазықты болған, сол үшін шыбын жанын құрбандыққа қиған, қазақ халқы атынан сөйлеген, жұрттың жоғын жоқтаған арлы да алғыр азаматын шәкірттеріміз сахнада тамаша сомдады. Не бәрі 44 жасында саяси қуғын-сүргін құрбаны болған ұлтжанды қайраткердің өнегелі өмірі, өшпес ісі жас ұрпаққа үлгі.
Семинар барысында әр өңірден келген қонақтар: мемлекет және қоғам қайраткері Қуаныш Айтаханұлы Айтаханов, тарих ғылымдарының докторы, Қожа Ахмет Ясауи атындағы Халықаралық қазақ-түрік университетінің профессоры Тұрсын Хазретәлі Маханұлы, сұлтанбектанушы Манахов Әбурайра, Сұлтанбек Қожановтың немере туысы Қоңқақов Төлен Қамбарұлы, Астана қаласы «Сұлтанбек Қожанов» қорының төрағасы Абуов Абай Пәрқұлұлы Сұлтанбек Қожанов туралы тың деректермен, сүбелі ойларымен бөлісіп, мектеп ұжымына алғыстарын білдірді.
Дәстүріміз бойынша, мектебіміздің алаңына келген қонақтадың қатысуымен бірге ағаш отырғызылып, бата берілді. Мектебімізге ресми түрде Сұлтанбек Қожановтың есімі беріліп, қуанышты да тарихи сәт орын алды.

Қожанов Сұлтанбек (1894-1938). Мемлекет және қоғам қайраткері, ұстаз, ғалым, публицист Қожанов Сұлтанбек 1894 жылы Оңтүстік Қазақстан облысы, Созақ ауданы, Ақсүмбе ауылында туған. Түркістандағы 4 сыныптық орыс-түзем бастауыш мектепті, 3 сыныптық қалалық мектепті, Ташкент мұғалімдер семинариясын тәмамдаған. Саяси қызметін Ташкент қаласында семинария оқушыларынан құрылған «Кеңес» атты астыртын жастар ұйымын құрудан бастаған.
1917 жылы көктемде Ташкентте Мұстафа Шоқай, Қ.Қожықов, Қ.Болғанбаев, С.Ақаевпен бірге «Бірлік туы» газетін шығарды.
Түркістан автономиясына қызу қолдаушылық танытып, оны кеңес өкіметінің әскер күшімен құлатуын жергілікті халықтың өзін-өзі билеу құқығын аяқ асты етушілік деп бағалады. Өлкеде кеңестік билік тұсында орын алған ашаршылыққа қарсы күресте белсенділік танытты.
С.Қожанов жаңа заман амалына сай 1920 жылы коммунистік партия қатарына қабылданып, үлкен қызмет баспалдақтарынан өтеді. 1920-1924 жылдары Түркістан компартиясы ОК мүшесі, Түркістан орталық атқару комитеті төрағасының орынбасары, Түркістан республикасының ішкі істер халық комиссары, Халық ағарту халық комиссары, «Ақжол» газетінің редакторы болады. «Ақжол» – Түркістанның іргелі елдік газеті болды. Ол «Жаңа өріс» газетінен бастау алды. Газет 1920 жылы 7 желтоқсанда жарық көрді. Алғашқы редакторы – С.Қожанов қайраткердің беделі мен елшілдігі арқасында аз жылда мұнда М. Дулатұлы, Ж.Аймауытұлы, А. Байтасұлы, Б.Сүлейұлы, Т.Шонанұлы, Х.Болғанбай т.б. азаматтар топтасты. 1922 жылы Түркістан Алаш көшбасшыларының бірі, ұлт ұстазы А.Байтұрсынұлының 50 жылдық мерейтойын лайықты атап өтті. «Шолпан», «Сана» журналдары «Ақжол» бағытын ұстанды. Аталған басылымдарда С.Қожанов «Тоқпақ», «Тарпаң», «Замандас» деген бүркеншіктермен мақала жазып тұрды. «Ақжолда» шыққан Сұлтанбектің «Жақындық па, жалақорлық па?», «Қазақша сауық кеші», «Менің жауабым», «О литературном языке и терминологии» атты еңбектерінен қаламгерлік пен өткенді танудағы ұстаным, шығармашылдықты бағамдау, руханиятты қадірлеу айқын аңғарылады. Елшіл газеттің бағыты 1925 жылы И.Сталиннің тікелей тапсырмасымен мұқият тексеріліп, ол 1926 жылы жабылды. 1921 жылы кеңестердің бүкілресейлік IX сиезінің бір үзілісінде В.И.Ленин С.Қожановты төралқаға шақырып, біршама әңгімелескен. Қайраткер 1922 жылы қази соттарын қалпына келтіру, тартып алынған вакуф жерлерді мұсылман жамағатына қайтару, жағымды дәстүрлерді қайта жолға қою секілді шетін мәселелерді қолға алып, түркістандықтардың алғысына бөленді. 1924-1925 жылдары Қазақ өлкелік партия комитетінің хатшысы, 1925-1926 жылдары БК/б/П ОК ұлт республикалары мен облыстары бойынша жауапты нұсқаушысы, Мәскеу марксизм-ленинизм курсының тыңдаушысы, 1928 жылы БК/б/П ОК Орта Азия бюросының үгіт-насихат бөлімі меңгерушісінің орынбасары, 1929-1931 жылдары Орта Азия мақта-ирригация политехникалық институтының алғашқы директоры, 1931-1932 жылдары Орта Азия мақта орталығы басқармасының төрағасы, 1932-1933 жылдары Мәскеуде Одақтық мақта өнімдері басқармасының орынбасары, 1933-1934 жылдары КСРО ХКС мақта тобы басшысының орынбасары, 1934 жылы кеңестік бақылау комиссиясының Өзбекстан бойынша өкілі болып қызмет атқарады. 1928 жылы Орта Азия партия тарихы институты қайраткердің «Кеңестік Түркістан автономиясының он жылдығына» атты кітабын басып шығарды. Осында ол жаңа республика құрудың қиын өткелдері мен алдағы міндеттерді айқын жазады. Сондай-ақ, осы ұлт күрескерінің И.Сталинмен пікірталасы әлі күнге аңыз болып айтылады. Ол қиын жылдары Алаш азаматтарына да көп көмектесті. 1923 жылы Мағжанның өлең кітабына алғысөз жазып жариялады. Фольклоршы Ә.Диваевқа ерекше қолдау көрсетті. Өзі де елдің мәдени-рухани шараларына атсалысып, «Ақжол», «Еңбекші қазақ» газеттері мен «Шолпан» журналына сан салалы мақалалар жазады. С.Қожанов көп замандастары секілді халыққа арналған сөзін өлеңмен де жеткізді. Оның шығармашылығында «Нені айтайын?», «Кім жауапкер?», «Көреміз!», «Шынға ұқсаған пікірлер», «Бұл кім?», «Тілмаштарға бір сын» т.б. өлеңдері мен К.Бальмонт, Эзоп (Д.Бедный тәржімесі) туындыларынан қазақша сөйлеткен аудармалары бар. Қайраткер 1937 жылы 16 шілдеде ұсталып, 1938 жылы 8 ақпанда атылды.

Гауһар Тұрсынқожа