«JOLTAP» жобасы жалғасуда

Астанада жұмыссыз қала тұрғындарының жұмыс тауып, қаржылық жағдайын жақсартуға мүмкіндік беретін «JOLTAP» жобасы жалғасып жатыр. Бұл жоба қала тұрғындарының білімі мен біліктілігін, сондай-ақ табысын арттыруға да көмектеседі. «JOLTAP» жобасы бойынша оқыту бағдарламалары мамандыққа байланысты 2 аптадан 1 айға дейін барынша қысқа мерзімде нақты дағдыларды меңгеруге бағытталған.

Бағдарламаның түлегі  Жұлдыз Жұмаділова интерьер дизайнымен 17 жылдан бері айналысады. Дегенмен бала кезінен тігіншілікке әуес болған. Осыған қарамастан тігіншілік оның хоббиі болып қала берді. Жұлдыз JOLTAP жобасы туралы білгеннен кейін өміріне өзгерістер енген.

«Мен Instagram арқылы JOLTAP туралы хабардар болдым. Бұл менің арманымды орындауға берілген мүмкіндік екенін түсініп, «тігінші» және «модельер» мамандықтары бойынша курстарға жазылдым. Жаттығудың алғашқы күндерінен-ақ дұрыс таңдау жасағанымды түсіндім», – дейді Жұлдыз.

JOLTAP бағдарламасы қатысушыларға жаңа мамандықтарды тез меңгеруге мүмкіндік беретін қарқынды тәжірибеге негізделген.

«Курстар өте сапалы түрде өтеді. Мұғалімдерге, әсіресе Анара Төлегенқызына кәсіби шеберлігі үшін алғыс айтамын. Ол бізге мамандықтың барлық қыр-сырын жеткізіп, қиын сәттерді түсінуге көмектесу арқылы табысқа жетуімізге себеп болды», — дейді кейіпкеріміз.

Жұлдыз тігіншілікті бала күнінен ұнатады. Ал алған білімі оның жаңа деңгейге шығуына мүмкіндік берді. Енді ол сән және киім саласындағы бизнесін де дамытуды жоспарлап отыр.
«Осыған дейін хоббиімді кәсіби қызметке айналдырамын деп ойламаппын. JOLTAP маған жаңа дағдыларды үйретіп қана қойған жоқ, мүмкін болатын нәрселер туралы көзқарасымды толығымен өзгертті. Қазір мен өз қабілетіме сенімдімін және осы салада дамуды жоспарлап отырмын», — дейді ол.

Сондай-ақ, Жұлдыз жаңа мамандықты тегін әрі тиімді меңгеруге мүмкіндік жасаған жобаны ұйымдастырғандар мен мемлекетке алғысын айтты.

«Бұл – көптеген адамдардың болашағына жасалған үлкен инвестиция. JOLTAP тек мамандықты өзгертуге ғана емес, сонымен қатар өзіңізді ашуға және арманыңызды жүзеге асыруға көмектеседі. Мен бұл білім үшін өте ризамын және мұндай бағдарламалар дами береді деп үміттенемін», — деп қосты ол. «JOLTAP» жобасының оқыту бағдарламалары еңбек нары­ғы­ның сұраныстарына сүйене отырып жасалған. Мәселен, жоба аясында заманауи мамандық – мобилографияны да тегін оқуға болады. Нәтижесінде, олар смартфон арқылы сәнді фото мен бейнежазбалар түсіріп, монтаждап, дайын контент жасауға машықтанады. «Joltap» жобасындағы «Мобилография» курсының оқыту­шысы Кәмшат Қапардың сөзінше, жаһанда ақпараттық технология қарыштап дамыған са­йын, SMM, мобилограф мамандығына да сұраныс артты.

Бүгінгі күннің заманауи мамандығы баристаны да жоба арқылы тегін оқуға болады. Бұл мамандықты таңдаған жандар иісі аңқып, дәмі тіл үйіретін кофе жасауды үйренеді. Ал нарықта бұл мамандыққа қызығушы адамдар көп. «JOLTAP» жобасының оқытушысы Тұрар Ілиястың сөзінше, әлеуметтік жоба арқылы осы уақытқа дейін «Бариста» курсын 500-ден астам елордалық тәмамдаған. Әлеуметтік жоба аясында осы уақытқа дейін 9 мыңнан астам елордалық біліктілігін арттырып, жұмысқа орналасқан.

Жоба негізінде оқыту бағдарламалары еңбек нарығының сұраныстарына сүйене отырып жасалған. Мәселен, жиһаз жасау негіздерін де жоба арқылы тегін оқуға болады. Бұл дағдыны меңгеріп алған жандар жиһаз өңдіру және оны құрастыру тәсілдерін үйренеді. Себебі бүгінгі еңбек нарығында жиһазды тапсырыспен жасатуға сұраныс артып келеді.

JOLTAP жобасындағы «Корпусты жиһаз жасау негіздері» курсын Марат Базарбеков жүргізеді. Осы салада 6 жылдық тәжірибесі бар оқытушы жобаға кездейсоқ келгенін айтады.

«Мен басқа жиһаз жасаушылар сияқты ең алдымен өз үйіме қажетті шкаф жасадым. Нәтижесін көрген соң, бұл іспен кәсіби түрде айналыспақ болдым. Осылайша елордадағы жиһаз цехтарының біріне жұмысқа тұрдым. Онда құрастыру және монтаждау негіздерін үйреніп, қосымша осы салаға қатысты интернетте қолжетімді ақпараттарды зерттедім. Жиһаз жасағаннан кейін оны тиімді сату жолдарын білу үшін JOLTAP жобасында «Таргетолог» курсына қатысуға өтініш білдірдім. Сол уақытта жиһаз жасау курстарын өткізіп жүрген соң, жобада жиһаз жасау курсы бар-жоғын сұрадым. Әрі қарай өз ұсынымды білдіріп, осылайша жаңадан ашылған курстың оқытушысы болдым», — дейді Марат Базарбеков.

Курс оқытушысының сөзінше, қатысушылар 8 күнде корпустық жиһаз жасау технологиясымен егжей-тегжейлі танысады.

«Осы курсты таңдаған жандар 6 күн бойы жаһаз жасау технологиясымен танысып, тәжірибе жүзінде жиһазды өлшеу және оның дизайнын сызу тәсілдерін үйренеді. Жетінші күні студенттер алған білімдері бойынша емтихан тапсырады. Ал соңғы күні менің цехымда жиһаз жасап, оны JOLTAP жобасы атынан өзімен бірге сыйға алып кетеді», — дейді ол.

Марат Базарбековтың айтуынша, аталған курсқа біліктілігін арттыру үшін дизайнерлер мен жиһаз жинаушылар да келеді.

«Байқағанымдай, курсқа келген студенттер ішінде дизайнерлер мен жиһаз жинаушылар да бар. Олар осы салада біліктілігін арттырып, табыс көзін ұлғайтуды мақсат етеді. Елімізде жиһаз жасаушылар саны жетіспейді, сондықтан да олар тапсырысты мерзімінде орындауп үлгермейді. Ал мен әр қазақстандықтың сапалы жиһаз алғанын қалаймын. Сондықтан жоба аясында жиһаз жасаушыларды дайындап, нарыққа білікті шеберлер шықса деймін», — дейді ол.

JOLTAP қысқа мерзімді оқыту бағдарламасы 18-50 жас аралығындағы Астана тұрғындары үшін қолжетімді. Оқудан кейін қатысушыларға сертификат беріледі. Ал түлектердің кандидатуралары JUMYS TAP Telegram-ботында тегін жарнамаланатын болады.

Г.Тұрлыбекова