«Qyzyl Book Art: Дала қазынасы» республикалық байқауы мәресіне жетті

Қазақстанның барлық өңірінен 1 180-нен астам оқушы қатысқан «Qyzyl Book Art: Дала қазынасы» республикалық байқауы табиғи мұраны өнер арқылы танытуға бағытталды. Жас суретшілер Қазақстанның Қызыл кітабына енген сирек кездесетін және жойылып кету қаупі бар жануарлар мен өсімдіктерді бейнелеп, табиғатты қорғау тақырыбын шығармашылық тұрғыда жеткізді. Байқау Креативті индустрияларды дамыту қорының бастамасымен, Қазақстан Республикасы Мәдениет және ақпарат министрлігінің қолдауымен өткізілді. Қатысушылар «Қазақстанның Қызыл кітабына енген жануарлар» және «Қазақстанның Қызыл кітабына енген өсімдіктер» бағыттары бойынша, 1–4, 5–8 және 9–12 сыныптар арасында бақ сынады.