«Denis Ten Memorial Challenge 2024» V Халықаралық турнирі

Sport Qory қолдауымен Астанада мәнерлеп сырғанаудан Denis Ten Memorial Challenge 2024 мерейтойлық V Халықаралық турнирі өтті. Жарысқа әлемнің 28 елінен келген спортшылар қатысып, түрлі санаттағы бағдарламаларды, сондай-ақ мұздағы билерді ұсынды. Биылғы жылы жарыста АҚШ, Канада, Италия және Оңтүстік Африка спортшылары өз бақтарын сынады.

Турнирдің ерлер санатында қазақстандық спортшы Михаил Шайдоров жеңімпаз атанса, ал Софья Самоделкина әйелдер арасында екінші орынды иеленді. Қазақстандық спортшылар жастар мен жасөспірімдер арасында да жүлделі орындарға ие болды.
Турнир соңында дәстүрлі гала-шоу болды. Бағдарламаға әлемдік мәнерлеп сырғанау жұлдыздары қатысты. Олардың қатарында екі дүркін әлем чемпионы Евгения Медведева, 2023 жылғы Еуропа чемпионы Анастасия Губанова, 2022 жылғы Олимпиада ойындарының күміс жүлдегерлері Евгения Тарасова және Владимир Морозов, үш дүркін вице-чемпион және Францияның қола жүлдегері Мари-Пьер Лерэ бар. Іс-шара Қазақстанның туризм және спорт министрлігінің, Астана әкімдігінің және Sportqory спортты қолдау қорының қолдауымен ұйымдастырылды.
6 жасынан бастап мәнерлеп сырғанауға ден қойған Денис Алматыда ірі сауда үйлерінде мұз айдынында жаттықты. 2003 жылы Ресейдің Одинцово қаласында өткен турнирде бапкері Елена Буянованың көзіне түседі. Нәтижесінде 2004 жылы Денис Тен Мәскеуге көшіп, кәсіби түрде жаттықты. 2006 жылы Қазақстан чемпионатына қатысып, қарсылас шақ келтірмеді. Жалпы, Денис Тенге ел біріншілігінде 4 (2006, 2010, 2011, 2017) мәрте ел чемпионы атағы бұйырды. 2013 жылы Канаданың Лондон қаласында өткен әлем чемпионаты қазақ спорты тарихына алтын әріппен жазылды. Өйткені, Денис Тен ел тарихында алғаш рет әлем чемпионатының күміс жүлдесін алып берді.
Мәнерлеп сырғанаудан Қазақстанның бес мәрте чемпионы, Олимпиада-2014 қола жүлдесінің иегері, әлем чемпионатының үш дүркін чемпионы, халықаралық конькимен сырғанаушылар рейтингінде 9-орындағы спортшы — мұның барлығы да қазақстандық Денис Тен туралы. Ол — 2018 жылға дейін Қазақстанға олимпиада ойындары, әлем чемпионаты, қысқы Азия ойындары және гран-при кезеңінен медаль алып келген алғашқы және жалғыз спортшы. Сондай-ақ, Денис Тен әлемде бильман атты элементті жасай алатын санаулы спортшылардың бірі болған. Денис Тен 1993 жылы 13 маусымда Алматыда дүниеге келген. Бала кезінен таэквандо, теннис, акробатика, каратэ, жүзу сынды әртүрді спорттармен айналысты. Біз үшін мәнерлеп сырғанаушы ретінде белгілі Денис Тен ең алғашқы жетістігіне хор айтуда жетіпті. 2002 жылы ол Оңтүстік Кореяда өткен бүкіләлемдік хор ойынында күміс жүлдегер атанды.