АСТАНА – ҰЛТАРАЛЫҚ ДОСТЫҚ ПЕН КЕЛІСІМНІҢ ОРДАСЫ

Астана – Қазақстанның жүрегі, тәуелсіздігіміздің символы, еліміздің мақтанышы. Елордамыз күн сайын көркейіп, әлемге танылып келеді. Сонымен қатар Астана – түрлі ұлт пен ұлыс өкілдері бір шаңырақ астында тату-тәтті өмір сүріп жатқан бейбітшілік пен келісімнің қаласы.

Қазақстанда көптеген ұлт өкілдері өмір сүреді. Олардың әрқайсысының өз тілі, мәдениеті, салт-дәстүрі бар. Соған қарамастан, барлығын біріктіретін ортақ құндылықтар – туған жерге деген сүйіспеншілік, өзара құрмет, достық пен бірлік. Менің ойымша, ұлтаралық келісім дегеніміз – әр адамның ұлтына, тіліне немесе дініне қарамастан, бір-бірін сыйлап, тең дәрежеде қарым-қатынас жасауы.

Астана қаласында түрлі мәдени іс-шаралар, фестивальдер мен кездесулер өткізіліп тұрады. Мұндай шаралар әр ұлттың мәдениеті мен дәстүрін танып-білуге мүмкіндік береді. Әсіресе, Қазақстан халқының бірлігі күні сияқты мерекелердің маңызы зор. Бұл күндері адамдар өзара ізгі тілектерін білдіріп, достық пен татулықтың қадірін түсінеді.

Елордадағы Бейбітшілік және келісім сарайы да татулық пен өзара түсіністіктің символы болып саналады. Оның сәулеті мен қызметі Қазақстанның бейбітшілікке, тұрақтылыққа және мәдениеттер арасындағы диалогқа мән беретінін көрсетеді. Осындай нысандар еліміздің бірлік пен ынтымақты жоғары бағалайтынын танытады.

Мен оқушы ретінде ұлтаралық келісімді сақтау әрқайсымыздан басталады деп ойлаймын. Мектепте сыныптастарымыздың ұлтына қарамай, бәрімен достық қарым-қатынаста болуымыз керек. Біреудің тілін, дінін немесе салт-дәстүрін құрметтеу – мәдениеттіліктің белгісі. Егер біз бір-бірімізді түсініп, көмектесіп, сыйластық танытсақ, қоғамымыз да берік болады.

Халқымыз «Бірлік бар жерде – тірлік бар» деп бекер айтпаған. Шынында да, елдің дамуы мен болашағы халықтың татулығына байланысты. Бірлігі жарасқан мемлекет қана алға қойған мақсаттарына жете алады.

Астана – тек әсем ғимараттары мен кең көшелері бар заманауи қала ғана емес, сонымен қатар достық пен келісімнің мәнін танытатын елорда. Қазақстанның әрбір азаматы ұлтаралық татулықты сақтауға үлес қосуы керек. Өйткені бейбітшілік пен бірлік – еліміздің ең қымбат байлығы. Мен Қазақстанда әрдайым достық пен ынтымақ салтанат құрып, барлық ұлт өкілдері тату-тәтті өмір сүре берсе екен деп тілеймін.

Ақнұр Әшім, Астана қаласы