2025 жылғы «Таза Қазақстан» акциясы

2025 жылғы 17 наурызда «Таза Қазақстан» акциясы аясында Астана қаласының Тұрғын үй және тұрғын үй инспекциясы басқармасы басшысының орынбасары Е. Мәлік көппәтерлі тұрғын үйлерге қызмет көрсететін ұйымдармен түсіндіру жұмыстарын жүргізді. Жұмыс барысында өз аумақтарын, аулаларды санитарлық тазалау, шатырларды қар мен мұздан тазарту, жертөле үй-жайларында, паркингтерде және кондоминиум нысанының жалпы мүлкін пайдаланатын басқа да орындарда дератизация, дезинсекция және дезинфекция жұмыстарын жүргізу қажеттілігі түсіндірілді. Астананың тұрғын үй инспекциясы қаладағы көпқабатты үйлердің тұрғындарына үндеу жасап, аулаларын тазалауға шақырды.

Астана қаласы Тұрғын үй және тұрғын үй инспекциясы басқармасы басшысының орынбасары Еркебұлан Мәлік департамент инспекторларымен бірге қаладағы көпқабатты үйлерді аралап, қызмет көрсететін ұйымдарға аумақтарды, аулаларды және шатырларды қар мен мұздан тазалау, санитарлық тазалау, сондай-ақ базаларды дератизациялау, жалпы аумақтарды дезинфекциялау, өзге де аумақтарды тазарту бойынша түсіндіру жүргізді.

Еркебұлан Мәліктің айтуынша, кондоминиум нысандарының тиісті санитарлық жағдайын қамтамасыз ету маңызды. Енді шатырда жатқан қар мен мұзды тазалауға, сондай-ақ қоқыстарды жүйелі түрде шығаруға баса назар аудару керек.

«Ең бастысы, қоқыс пен қар дер кезінде шығарылып, жер мұз болып жатпауы керек. Өйткені, бұл үйлерде көптеген қарттар мен балалар тұрады. Үйді таза ұстау және дер кезінде дезинфекциялау қажет. Бұл жұмыстар жүйелі түрде жүргізілуі керек», — деді басқарма басшысы.

Елордалық тұрғын үй кешенінің сервистік ұйымының қызметкері аумақты тазарту бойынша көктемгі барлық қажетті жұмыс жүргізіліп жатқанын атап өтті.

«Біз көктемгі дайындық жұмыстарын жүргізіп жатырмыз, аумақты қардан, ғимараттар мен шатырларды мұздан тазартып жатырмыз. Мұның бәрі жасалды. Дезинфекция да тоқсан сайын жүргізіледі», — деді ол.

Астанада «Таза Қазақстан. Астана – тазалық пен тәртіптің үлгісі» ауқымды экологиялық акциясы аясында «Таза бейсенбі» іс-шарасы жалғасып жатыр. Елордалық АMANAT партиясының өкілдерімен бірлесіп өткізілген Таза бейсенбіге 100-ден астам қатысып, Байқоңыр ауданындағы Өндіріс тұрғын алабына іргелес орналасқан «Көгілдір мүйіс» аумағын қоқыстан тазартты, деп хабарлайды елорда әкімдігінің ресми сайты.

Экоакция нәтижесінде, аудан аумағынан 11 тонна қоқыс шығарылды. Тазалық жұмыстарына арнайы техника жұмылдырылып, 8 рейс қоқыс полигонына шығарды.

AMANAT партиясы Астана қалалық филиалының саяси жұмыс бөлімінің басшысы Әбдіғани Бәзілханұлы «Таза бейсенбі» партиялық жобасы жаңа экологиялық мәдениет пен азаматтардың қоршаған ортаға деген саналы көзқарасын қалыптастыруды көздейтінін атап өтті.

«Бұл экологиялық акцияны еңбек тұрғысынан емес, идеология жағынан қарау керек деп ойлаймын. Адамдар өзінің туған жеріне, оның тазалығына мән беру керек. Елімізге, елордамызға келетін шетелдіктерге тазалығымыз, экологиялық мәдениетіміз көрінуі тиіс. Сондықтан да бұл ұлттық жоба халықты біріктіріп, тазалыққа шақырады», — дейді Ә.Бәзілхан.

AMANAT партиясы Астана қалалық Байқоңыр аудандық филиалының атқарушы хатшысы Сергей Матюшенконың сөзінше, бүгінгі тазалық жұмысына 100-ден астам адам қатысып жатыр.

«Бүгін біз бастауыш партия ұйымдарымен бірге «Көгілдір мүйіс» деп аталатын қаладағы көрікті жерге келіп, аумақты қоқыстан тазалап жатырмыз. «Таза бейсенбілік» акциясына шамамен 100-ге жуық адам қатысып жатыр. Көрікті жерге тоқталсақ, қала тұрғындары мен қонақтары арнайы осы орынға келіп, естелікке суретке түсіп жатады. Бірақ өкінішке қарай, келушілер қоқыс тастап кетеді. Экоакция аясында барлық қазақстандықтарды тазалыққа шақырамыз», – дейді С.Матюшенко.

Айта кету керек, ауқымды экоакция аясында қаланы санитарлық тазарту, нөсер және арық кәріздерін тазарту, көшелерді, тротуарларды, орамішілік аумақтарды, қоғамдық кеңістіктер мен аулаларды тазалау жұмыстары жүргізілуде.

Сонымен қатар, экоакция аясында Білім басқармасының ұйымдастыруымен елорда мектептерінде «Таза мектеп» челленджі басталды.