Oqımyn (Latyn álipbıinde oqy)

Besikke bólep bóbegin,
Shókıte qoıyp shúmegin,
Baýyrsaq shaınap jegizgen.
Jaıa desem jal berip,
Seker desem bal berip,
Aıalap mama emizgen
Aıaýlym Anam aman bol!

Ruqsat
qyl, oqımyn,
Oqyǵanda kim bolam?
Janaryńa nur bolam.
Ashamaılap taı baılap,
Taı terletsem «baı — baılap»,
Azyraq aǵat is qylsam
Áýlikken ákem aıǵaılap,
Qozydan uıyqtap qalǵanda
At baýyryna alǵanda,
Aıyrǵan anam «qoı-qoılap».
Azapqa meni aıdaýshy eń,
Uzaq kún ózin doıby oınap.

Ázirge, áke, aman bol,
«Jol bolsyn» aıt, oqımyn.
Oqyǵanda kim bolam?
Sharýań da men bolam.
Jelegimenen jelpigen,
Jeńeshetaı — aý, jylama.
Tulymshaǵy seltıgen
Qaryndasym Nurbala,
Bala da sendeı bola ma?
Saǵynba, sáýlem, kelemin,
Aınalyp seni súıemin,
Aman bol deshi aǵańa.
Jenesheń, qarǵam, qaraıdy,
Shashyndy jýyp, taraıdy.
Oqımyn, ketem qalaǵa.

Oqyǵanda kim bolam?
Men senderge til bolam.
Aq merýertteı kógendep,
Aqboz attaı júgendep
Oınaǵan qońyr qoshaqaı,
Mańqıyp qosyl, aman bol!
Shap aıyldap shymshylǵan,
Shymshylǵan qyzdaı qymsynǵan,
Qysyryn emgen qyzyl taı,
Tekbishegiń terlemes,
Ázirshe aman júre tur,
Kisinemeı kishkentaı.

Uq sonymdy, aıttym sol!
Jibek júniń jelpildep,
Móldir kóziń móltildep,
Qaz — qaz basqan baladaı
Kelýshi ediń selkildep.
Bozdamashy, botaqan!
Oıyma aldym uzaq jol
Ol betimde oqımyn.

Oqyǵanda kim bolam?
Tórt túlikke tól bolam.
Qarta buırat, qos qolat,
Qum saǵyzdy qumym — aı!
Taýym, sútteı sýyń — aı!
Syldyrlaı tur ázirshe,
Aınalarmyn álimshe.
Zańy zańbar zamanym
Beti — qol saǵan jýǵyzbas.
Qoıany qoıdaı Aqózek,
Qoǵaly kóldeı Kókózek
Kóbelek senen qýǵyzbas.
Qoı — serkesh qol hat oqytyp.
Qoraly qoıdy qoqytyp,
Jelilep jylqy jıǵyzbas.
Esim kirdi, eseıdim,
Endeı alman elime,
Beker júrmin belimde.
Batbaǵynda oınap kúmis qol,
Balshyqtan túıe qoıǵyzbas.

Qol — aıaǵym bosanyp
Dáýirledi dáýirim.
Belimdi býyp, bet almaı
Basylmaıdy aýyrym.
Alyp ushady kóńilim,
Ózgelendi ómirim.
Julyp ushady júregim,
Telegeılendi tilegim.
Tunyǵyńda oınatyp
Túbegim shybyq qıǵyzbas.
Aman bol, meken, attandym,
Attanǵanǵa shattandym.
Qabaǵyma qaramaı,
Qalaısha qala sıǵyzbas.
Qutty qonys, hosh, esen,
Umtyldym órge oqımyn.

Oqyǵanda
kim bolam?
Kúrkirep janar kún bolam.
Qarasha aýylym shoshaıǵan!
Kóshesiń qashan sol saıdan?
Jalqaýlyq penen kedeılik
Kóshirer me eken sol saıtan?!
Bekemge baılap belimdi
Aınalam ońǵa osy aıdan.
Taryqqan álem tabyna
Qolymdy qosa shoshaıtam.
Osy betpen, nıetpen
Aýylǵa ázir hosh aıtam.
Aman bol, aýyl, oqımyn.
Oqyǵanda kim bolam?
Aýylyma aı, kún bolam!

İlıas Jansúgirov

ПІКІР ЖАЗУ