Алпамыс, Исатай, Райымбек бабалар қайда?

6bet_f110«Шрек», «Спайдермэн», «Микки Маус», «Наруто»  мен «Өрмекші адамнан»  өзіне идеал іздеген ұл-қызымыз неге «Батырлар»  жыры мен лироэпостық жырлардың кейіпкерлерімен көгілдір экранда сырласпайды?
Данагөй қарттарымызды дискілер алмастыруда
Мағжан Жұмабаев: «Жас баланың миы ақ қағаз тәрізді. Оған не жазсаң, сол болады» деп бала тәрбиесіндегі ойын ойып айтып кеткен. Ғалымдардың зерттеуі бойынша балаға 10-12 жасқа дейін қандай тәрбие берілсе, өмірлік ұстанымы сол бағытта қалыптасады екен. Басылым бетінде «Баламыз не көріп, не тыңдайды?»  деген пікірді оқып шыққан соң, бізде өз ойымызды ортаға салсақ дедік. Қазақ халқының біртуар  қаһарман ұлы Бауыржан Момышұлы бір сөзінде: «Ертегілер айтатын адам қалмай ма деп қорқамын» депті. Өткен ғасырдың аяғында айтылған осынау қағида бүгінде шындыққа айналып барады. Біздің бала кезімізде ата-әжелеріміз халық ауыз әдебиеті туындыларын айтудан жалықпайтын. Жаһандану дәуірінде сол дана қарттарымызды  дискілер алмастыруда. Ондағы көрсетілімдердің барлығы да ұзынсонар аяқталмайтын батыстың  мультфилмдері мен фильмдері. Баланың психологиясына  мұндай көріністер кері әсерін тигізбей қоймасы анық.
Назгүл Белсходжаева.

Неге сапасы төмен, бағасы арзан?
Міне, бұл қазақ тіліндегі қазақ әншілерінің әндері мен ойын-сауық отаулары көрсетілімдеріне байланысты айтылып отыр. Сонымен, дискі сататын арнайы дүкендер мен базарларды ерінбей араладық. Қазақ тілінде не бір ертегі, не бір батырлар жыры жоқ екен. Ал, қазақ әншілері мен ойын-сауық отауының  қойылымдарының дискілерін алып, теледидарға қоссаң, таза жазылмаған. Сапасы өте нашар. «Арзан еттің сорпасы татымас» демекші, ең төмен бағасы 100 теңгеден жоғары  қарай сатылатын  мұндай дүниелерден  толық ешнәрсе көре алмайсың. Керісінше, батыстық фильмдер көшірмелерінен мұндай сорақылықты көрмейсің. Кейінгі кезде, «Көліктер-2» мультсериалы қазақшаға аударылып, көгілдір экран арқылы берілуде. Біздің киностудияларымыздың ұлттық дүниелерімізді ұлттық нақышында экранға шығаруға шамасы неге келмейді? Сол «Көліктерді» сатып алып, қазақшаға аударып, эфир арқылы таратуға қаншама қаржы жұмсалып жатыр емес пе?
Динара Айнекова.

Кітапханадан көркем  шығарма таппайсың
Қала баласы кітапханаға барамын десе де, не кітап дүкендерін аралаймын десе де мүмкіндігі мол. Ал, ауылдық жерді айтпағанда, аудан орталығындағы кітапханадан балалар мен жасөспірімдер іздегенін әрдайым таба алмайды.  Мысалы, аудандық кітапханада  «Батырлар жыры» мен «Лироэпостық жырлар» саны санаулы. Бір бала алып кетсе, қалғаны соның қайта әкелгенін күтеді. Ауылдық жердің рухани қазынасы — мектеп кітапханасы. Ондағы әдеби шығармалар, әсіресе балаларға қажетті жоғарыда біз айтқан дүниелер жоқтың қасы. Ол аз болғандай, балалар нағыз кітап оқып, назарын басқаға бұрмайтын жазғы демалыс кезеңінде кітапхана жабық болады. Содан келіп, жасөспірімдер ғаламторға қамалып, теледидар алдында омалып, дискіге шырмалып, қажет, қажет емес көрсетілімдерге бой алдырып есеюде. Бос уақыт деген оларда мүлде жоқ. Тіпті, кей бала көзі ұйқыға кетіп бара жатып, жанталасып  тыңдағышты құлағына салып үлгереді. Сонымен, әуен біткенше құлағында музыка ойнай береді.Біздер үшін жанпида  болған батыр бабаларымыз, қара қылды қақ жарған шешендерімізді, олардың қалдырып кеткен бай рухани қазыналары біртіндеп ұмытылмасына кім кепіл? Себебі, күннен- күнге олардың орнын батыстық  кейіпкерлермен алмастырып келеміз…

(Өз тілшімізден).

Добавить комментарий

Ваш e-mail не будет опубликован. Обязательные поля помечены *